The Program's Unique Features Include:

  • Face-to-face instructions by experienced Lincoln University professors from the United States
  • Curriculum designed by Lincoln University-USA
  • Degress are awarded by Lincoln University-USA
  • Programs are fully accredited both in the USA & Ethiopia

በአሜሪካ ሊንከን ዩኒቨርሲቲ የሁለተኛ ዲግሪያቸውን እየተማሩ ነበር፡፡ በወቅቱ የማስታወቂያ ሰሌዳው ላይ የተለጠፈው ማስታወቂያ አገራቸው ገብተው ለመሥራት የነበራቸውን ፍላጎት ለማሳካት ዕድል ከፈተ፡፡

ዩኒቨርሲቲው በትምህርት ዲፓርትመንቱ ፈቃድ በሰርቢያ፣ በቬትናም፣ በካናዳ፣ በናይጄሪያና በሌሎችም አገሮች ቅርንጫፎች ያሉት ሲሆን፣ በወቅቱ የተለጠፈው ማስታወቂያ ደግሞ ናይጄሪያ ሌጐስ ያለውን ቅርንጫፍ በፀጥታ ምክንያት መዝጋቱን የሚገልጽ ነበር፡፡ መረጃ ሲያጠያይቁም ከአሜሪካ ናይጄሪያ በመጓዝ የሚያስተምሩት መምህራን በሌጐስ ለማስተማር ፈቃደኛ አልነበሩም፡፡ በሌጐስ ያለውንም ካምፓስ እንደ እስር ቤት ነበር የሚቆጥሩት፡፡

የሌጐሱ የሊንከን ዩኒቨርሲቲ ቅርንጫፍ መዘጋት ለኢትዮጵያ መልካም ዕድል እንደሆነ የተገነዘቡት ትውልደ ኢትዮጵያዊው አቶ አቤቱ መላኩ፣ ዩኒቨርሲቲው ቅርንጫፉን በኢትዮጵያ እንዲከፍት፤ በኢትዮጵያ ሰላም እንዳለ፣ በርካታ የተባበሩት መንግሥታትና ሌሎችም ዓለም አቀፍ ድርጅቶች መኖራቸውን፣ አሜሪካውያን መምህራንም ኢትዮጵያ ሄደው ቢያስተምሩ ደኅንነታቸው የተጠበቀ እንደሚሆን ገልጸው ፕሮፖዛላቸውን (ንድፈ ሐሳብ) ለዩኒቨርሲቲው ያቀርባሉ፡፡ ዩኒቨርሲቲውም ንድፈ ሐሳቡን በአዎንታ ነበር የተቀበለው፡፡

በአሜሪካ ከሊንከን ዩኒቨርሲቲ ያገኙትን ፈጣን ምላሽ ያህል ግን በኢትዮጵያ የትምህርት ተቋሙን ቅርንጫፍ ለመክፈት ቀላል አልነበረም፡፡ አቶ አቤቱ እንደሚሉት፣ ቅርንጫፉን በኢትዮጵያ ለመክፈት ግልፅ የሆነ መመርያ አልነበረም፡፡ በመሆኑም አገር ውስጥ ካለ ኮሌጅ/ዩኒቨርሲት ጋር በጥምረት መሥራት ነበረባቸው፡፡

‹‹ትንሽ ነገርም ቢሆን ይዤ አገሬ ላይ መሥራት አለብኝ›› የሚል ዓላማ የነበራቸው አቶ አቤቱ፣ ተስፋ አስቆራጭ ውጣ ውረዶችን አልፈው ከሊንከን ዩኒቨርሱቲ ጋር አብሮ የሚሠራውን ዌስተርን ዩኒቨርሲቲ ኮሌጅ የመሠረቱት ከአራት ዓመት በፊት ነው፡፡

‹‹ውጭ የተማረም ሆነ የኖረ ሰው አገሩን ለማልማት ሲመጣ አገርን ሊረዳና ሊለውጥ በሚችል ዘርፍ ቢሰማራ ጥሩ ነው›› የሚሉት አቶ አቤቱ፣ በትምህርቱ ዘርፍ ተሰማርቶ የእውቀት ሽግግር ለማድረግ ዌስት ዩኒቨርሲቲ ኮሌጅን ኢትዮጵያ ውስጥ በመክፈትና ከሊንከን ዩኒቨርሲቲ ጋር አብሮ በመሥራት ላይ ይገኛሉ፡፡

ድንበር ተሻጋሪ የትምህርት ተቋም በመሆን የተመዘገበው ተቋም በማስተርስ ኦፍ ቢዝነስ አድምንስትሬሽን የማስተማር ፈቃድ ተማሪዎችን እያሠለጠነ እንደሚገኝና በጤናው ዘርፍ በዳያግኖስቲክ ኢሜጂንግ ፣ ደግሞ በ2008 ዓ.ም. ለመጀመር ቅድመ ዝግጅት እያደረጉ መሆኑን ገልጸዋል፡፡

አቶ አቤቱ እንደሚሉት፣ የተቋሙ መርሃ ግብር ዋና ዓላማ ተማሪዎች ውስጥ የኢንተርፕሩነርሽፕ መንፈስ መፍጠርና የሚያቀርቡትን ቴሲስ ደግሞ በአገሪቱ ማኅበራዊ ኢኮኖሚ ውስጥ መተርጐም እንዲችል ማበረታታት ነው፡፡

ጥራቱን የጠበቀ ትምህርት ለመስጠትም ተማሪዎች በአንድ ጊዜ አንድ ኮርስ ብቻ የሚማሩ ሲሆን ሠራተኞችን ለማበረታታትም መርሃ ግብሩ የሚሰጠው ማታ፣ ቅዳሜና እሑድ ብቻ ነው፡፡ አብዛኞቹ መምህራንም ከአሜሪካ ሊንከን ዩኒቨርሲቲ የሚመጡ ፕሮፌሰሮች ሲሆኑ ትምህርቱ ሙሉ ለሙሉ የሚሰጠው ፊት ለፊት ነው፡፡

ከቢዝነስ አድምንስትሬሽን በተጨማሪ በዲግሪ ደረጃ የጤና ሳይንስ (ዲያግኖስቲክ ኢሜጂንግ ፕሮግራም) ለመስጠት ዝግጅት አየተጠናቀቀም ነው፡፡ እንደ አቶ አቤቱ፣ ተቋማቸው ከጐንደር ዩኒቨርሲቲ ጋር ለመሥራት ዕቅድ አለው፡፡ ከቅዱስ ጳውሎስ ስፔሻላይዝድ ሆስፒታል ሚሊኒየም ኮሌጅ ጋር አብሮ ለመሥራትም እየተነጋገሩ ነው፡፡

የሊንከን ዩኒቨርሲቲ ኤክስቴንሽን በመሆን በማስተርስ ኦፍ ቢዝነስ አድምንስትሬሽን እያስተማረ የሚገኘው ዌስተርን ዩኒቨርሲቲ ኮሌጅ፣ ከተመሠረተ ከ2010 ጀምሮ በሦስት ዙር ያስመረቀ ሲሆን በህዳር 2007 ዓ.ም. ውስጥ ደግሞ ለአራተኛ ጊዜ የሚያስመርቅ ይሆናል፡፡

አቶ አቤቱ፣ እ.ኤ.አ. በ2003 ከአንድ አሜሪካዊ ጋር በመሆን ብሉ ናይል የተባለ ኢንተርፕራይዝ በማቋቋም በአስመጪና ላኪነት በመሰማራት የኢትዮጵያን አምቦ ውኃ ሌብል አሠርተውና አስፈቅደው አሜሪካ ገበያ ላይ እንዲውል ያደረጉ ናቸው፡፡

‹‹አመጣጤ ቀስ ብሎ በእርጋታና በእርግጠኝነት ጥሩ የትምህርት ሥርዓት መመሥረትና እግረ መንገዱንም ንግድ ሆኖ ለእኔም መኖርያ ማድረግ ነው›› የሚሉት አቶ አቤቱ፣ በቢዝነስ የሁለተኛ ዲግሪያቸውን ከአሜሪካ ሊንከን ዩኒቨርሲቲ ያገኙ ሲሆን ፒኤችዲያቸውን እየሠሩ መሆኑንም ነግረውናል፡፡